مع دخول شهر رمضان واستعداد المواطنين لتجهيز السلع الغذائية وتخزينها كعادتهم سنويًا، أطلق مجموعة من الشباب والبائعين بمنطقة الإمام الشافعي بالخليفة عدة مبادرات لمساعدة الأسر الفقيرة، وتسهيل عمليات شراء السلع والمنتجات بأرخص الأسعار، إذ قام محمد غنيم جزار بالمنطقة بتوزيع لحوم يوم السبت الماضي مجانا على أهالي المنطقة، بواقع 2 كيلو لكل فرد يأتي إلى المحل.
ويقول مؤمن أحمد من أهالي المنطقة وأحد المشاركين في مبادرات الشباب: «الحاج محمد غنيم معروف عنه الخير، وكل سنة كان بيوزع كراتين وشنط سلع للأهالي في رمضان، والسنة دي كنا رايحين نطلب منه إنه يشارك معانا في مبادرة عاملينها، ويبيع اللحمة بـ200 جنيه للكيلو، لكنه فاجئنا كلنا ولقيناه بيوزع اللحمة ببلاش».
«مؤمن»: «أحلى حاجة في منطقتنا إننا بنحس ببعض»
ويضيف مؤمن: «أحلى حاجة في منطقتنا إننا كلنا بنحس ببعض وبنعمل أي حاجة علشان نساعد بعض، بما إننا منطقة شعبية ففي أسر كتير عندنا على قد حالها لكن أهل الخير دايما بيساعدوا والبركة والسعادة تلاقيهم عندنا على طول».
المبادرة تسعد أهالي المنطقة
وحققت المبادرة انتشار كبير وسعادة بين أهالي المنطقة الذين أسرعوا لإخبار بعضهم البعض لانتهاز الفرصة والاستفادة منها، ووجهوا الشكر لصاحبها الذين لا ينسى أهل منطقته أبدًا ويقول أيمن الوكيل أحد المشاركين في مبادرة توزيع اللحوم: «كلنا بنحب الخير وأول ما بنعرف إن حد بيقدم مساعدة لأهل منطقتنا تلاقينا أول ناس نجري ونقف معاه، وأنا كنت من ضمن الفريق مع المشارك مع الحاج محمد غنيم في التجهيزات والتوزيع على أهالي المنطقة».
وبسؤاله عما إذا كانت هناك أسر تحصل على كمية أكبر عن غيرها أو يحدث تكرار في التوزيع أجاب: «الحاج محمد وإحنا عارفين أهالي المنطقة كلها، فصعب إن حد ياخد مرتين أو ياخد حق غيره وكمان الناس عندنا بتقدر ده وتلاقي الفقير بيحاول يساعد غيره على قد ما يقدر».
مبادرة أخرى لبيع لحوم بأسعار مُخفضة
في سياق منفصل، أطلق حمادة ثروت جزار بالمنطقة مبادرة لبيع اللحوم مخفضة لأهالي المنطقة بـ200 جنيه للكيلو بمناسبة شهر رمضان: «حاولنا نسهل على أهل منطقتنا ونستغنى عن مكسبنا علشان الناس تشتري وتدخل رمضان وهي مبسوطة، اتفقنا أنا وجزار زميلي اسمه سامح إننا هنعمل المبادرة دي وقفلت المحل بتاعي وروحت وقفت معاه علشان نشتغل ونخدم أهل المنطقة»
ويضيف حمادة: «شارك معانا مجموعة من أهل الخير، واتفقوا معانا لو في أي خسارة كمان هيتحملوا معانا والحمد لله عدت على خير، كنا بنبيع الكيلو بلدي بـ200 جنيه، وهو برة مش أقل من 260 جنيها ودبحنا يوم الجمعة 3 عجول، وكنا بندي كل واحد في الأول لغاية 3 كيلو لكن لما لقيناهم عاوزين أكتر ماحبيناش نزعل حد واديناهم اللي عاوزينه ولما لقينا في ناس بتقول ما لحقناش نشتري دبحنا يوم السبت عجلين تانيين علشان نكفي أكبر عدد ممكن محتاج يشتري».
وبسؤاله عن خسارته بسبب إغلاق محله لمدة يومين، قال: «أنا ما بتأخرش على الخير حتى لو هخسر فلوس بس الثواب عند ربنا كبير، وقولت لزبايني أنا قافل اليومين واللي حابب يشتري من المبادرة ييجي ينورنا واللي عايز يستنى وييجي يشتري من المحل عندي بعد ما نخلص المبادرة أهلا بيه برضو والأرزاق على الله».