ميدو يهاجم محمد الشناوي: «القائد لازم يحمي زمايله مش يحرجهم أكتر»

انتقد أحمد حسام ميدو، نجم نادي الزمالك والمنتخب الوطني الأسبق، محمد الشناوي حارس مرمى فريق كرة القدم الأول بالنادي الأهلي، وذلك بسبب ردود أفعاله الغاضبة والمسيئة تجاه زملائه في الفريق أثناء المباريات التي يخوضها الفريق الأحمر.

وقال أحمد حسام ميدو في تصريحات تليفزيونية: «الجماهير أكتر ناس بتحس وبتتأثر في المنظومة، وجماهير النادي الأهلي شايفة إن فيه حاجة غلط مش في مستوى محمد الشناوي خلال الفترة الأخيرة، لكن دوره مهم جدا كقائد للفريق».

ميدو للشناوي: هناك فرق بين التوجيه وتحميل الأخطاء

وتابع: «أود أن أتوجه برسالة خاصة لمحمد الشناوي، مفادها إنه فيه فرق كبير بين التوجيه وإرشاد اللاعيبة وإنك بتخلي اللاعيبة تشيل المسؤولية الخاصة بأخطائها علنا وأمام الجميع وأولهم الجماهير، ما كل الناس يا شناوي عارفين إن علي معلول هو السبب في الهدف الثاني لكن رد فعلك ضده مبالغ فيه بشكل كبير، وكأنك بتشيله المسؤولية وبتحرجه أكتر وأكتر».

وأضاف ميدو: «هناك فرق بين التوجيه والنصح وبين إنك تحرج زملائك أكتر وتركبهم الغلط قدام الجمهور».

ميدو للشناوي: لازم تحمي اللاعبين

واختتم ميدو حديثه قائلا: «أنا كنت سعيد الحظ بإني لعبت تحت قيادة لاعيبة كبار زي هاني رمزي، وتوتي، وروبي كين، وقائد الفريق الصح اللي بيدور على مصلحة لاعيبته وبيحميهم، وبالتالي لازم تبقى أكثر هدوءا في ردود أفعالك، وبالتالي من حقك تزعق في أوضة اللبس وفي الغرف المغلقة بينك وبين زمايلك، لكن في الوقت ذاته لازم تحميهم في الملعب أكتر من كدة».