في مشهد مبهر بين أهالي منطقتي الإمام الشافعي وبئر أم سلطان، ضرب شاب يدعى حمادة الصعيدي، مثالا للشرف والأمانة، جعل ما فعله حكاية يتناقلها الأهالي بالإشادة والدعوات بالخير، بعد أن عثر على مبلغ مالي قدره 70 ألف جنيه، أثناء ذهابه لممارسة رياضة رفع الأثقال.
حمادة الصعيدي صاحب الـ37 عاما، مهندس زراعي من محافظة قنا، يقطن حاليا في منطقة الإمام الشافعي بالقاهرة، عثر على المبلغ المالي أثناء ذهابه للجيم: «لقيت كيس أسود تحت رجلي، وسمعت صوت مفاتيح فيه، مسكته لقيت جواه فلوس وموبايل أسود قديم من غير خط».
رحلة بحث «حمادة» عن صاحب المبلغ
يقول حمادة: «فضلت ألف على المحلات اللي عندنا في المنطقة وروحت صيدلية كانت جنب المكان اللي لقيت فيه الفلوس إديتهم رقمي، وقولتلهم لو حد جه سأل على فلوس ضايعة منه هي معايا، ولو حتى وقت الفجر اتصلوا بيا على طول».
يضيف «الصعيدي»: «فضلت 4 أيام على الحال ده، كل شوية ألف على المحلات أسألهم لو حد جه وسأل على الفلوس، ويقولولي لأ، وقلت في الآخر لو ملقيتش صاحبهم هعمل وجبات وأوزعهم على الغلابة من أهل المنطقة، أو هجيب بيهم فرش للمساجد اللي محتاجة».
«حمادة»: لقيت صاحب المبلغ بعد 4 أيام
يحكي حمادة عن العثور على صاحب المبلغ: «بعد 4 أيام لقيت رقم بيكلمني، وواحدة بتقولي تفاصيل الشنطة والمبلغ بالظبط، وقالتلي إنها من بئر أم سلطان، كانت عايزة تجيلي قلتلها خليكي مكانك، وأنا هجيلك، وركبت توك توك وروحت إديتها الأمانة وقت أذان المغرب والصيام، قلبي ارتاح بعدها علشان الأمانة رجعت لأصحابها».
تقول هاجر صاحبة المبلغ بعد عودته إليها: «حمادة شاب محترم وصعيدي أصيل، ربنا يباركله ويكتر من أمثاله علشان نادرا لما تلاقي حد في الزمن ده يرجع جنيه مش 70 ألف جنيه»، مضيفة: «الفلوس دي بتاعة عملية قلب مفتوح لأمي، ووقعت مني وأنا في منطقة الإمام، كنت جايباهم قبض الجمعية ورايحة أركب توك توك، بس الحمد لله إنهم رجعوا لاننا مكناش عارفين هنعمل إيه».
وتقول «هاجر»، عن إعطاء مكافأة للشاب بعد عثوره على المبلغ: «حاولت كتير معاه أديله مبلغ 5 آلاف جنيه كمكافأة على أمانته لكنه رفض بشدة، وطلب مننا بس ندعيله وساب الفلوس ومشي على طول».