بوابة من الأحلام فتحها الدولي المصري محمد صلاح، لاعب ليفربول الإنجليزي أمام الشباب بمختلف محافظات مصر، رغبة في الوصول بموهبتهم إلى العالمية، ما دفع أحمد رمزي، لاستغلال فن فيكتور آرت في رسم الشخصيات الشهيرة.
أحمد رمزي، طالب الثانوية البالغ من العمر 18 عامًا، والقاطن في محافظة الإسكندرية، اكتشف موهبته بالصدفة؛ نتيجة تواجده داخل المنزل وقت تفشي فيروس كورونا المستجد، وفقا لما رواه لـ«الوطن»: «اخترت نوع الفن ده أجربه، علشان بحب الكمبيوتر والجرافيك فبدأت اتعلمه من اليوتيوب لفترات طويلة، وقدرت أوصل لمرحلة متطورة في حوالي سنتين».
فيكتور آرت، نوع من أنواع الرسم الديجيتال، يعتمد على مناطق النور والضل في الصورة بمجموعة خطوط تكون الرسمة، هكذا حكى طالب الثانوية العامة: «لازم تكون حابب الموضوع وعندك موهبة في ابتكار استايل خاص بيك في الرسم، تتعرف بيه والموضوع بيتطور أكتر بالممارسة».
«اليستريتور وفوتوشوب وكوريل درو وبروكريت»، مجموعة من البرامج يستخدمها «رمزي» في تحويل الخطوط لصور فنية مبهرة: «صحابي الأول كانوا فاكرين بعمل فلاتر، لغاية ما عرفوا ان ده فن رسم اسمه الفيكتور آرت، علشان كده تنمرهم عليا اتحول لدعم منهم، لكن أهلي ساندوني من أول رسمة ليا».
ساعات طويلة يستغرقها الشاب في رسم فيكتور آرت، تصل إلى إجمالي 14 ساعة عمل على فترات متباعدة خلال الأسبوع «عدد الساعات بيختلف على حسب تفاصيل الرسمة، وأكتر شخصية خدت مني وقت محمد صلاح».
«رمزي»: محمد صلاح بوابتي للنجومية
رسومات عديدة لنجوم الرياضة العالمية قدمها الشاب الصغير لجميع متابعيه على السوشيال ميديا، بينها رسمة للاعب كمال الأجسام المصري، بيج رامي الذي تداول الصورة عبر صفحته الشخصية على مواقع التواصل الاجتماعي، بالإضافة لرسم كلا من كريم بنزيما، مهاجم ريال مدريد الإسباني، والمصري محمد صلاح، وغيرهم من المشاهير.
ويحلم «رمزي» بالوصول للعالمية من بوابة محمد صلاح: «نفسي يشوف صورته اللي رسمتها ليه، وينزلها على صفحته علشان متابعينه حول العالم يعرفوني، لأن نفسي أوصل لمرحلة المشاركة في معارض عالمية أقدم فيها موهبتي على طريقة صلاح بس في مجالي».