مكان صغير تجاوز عمره الـ65 عاما بمنطقة الدرب الأحمر وبالتحديد بشارع القرابية بهتت جدرانه من أثر القدم، يقف بداخله شاب ثلاثيني ومعه شقيقه يصنعان المشروبات الساخنة المختلفة، حيث ورثا المهنة عن جدهما.
ورث فهد سمير صاحب 36 عاما من مواليد منطقة الدرب الأحمر بمحافظة القاهرة، مهنة إعداد المشروبات الساخنة أبا عن جد وفق حديثه لـ«الوطن»: «جدي كان صاحب القهوة دي وبعدين أبويا كان اشتغل فيها ولما أتوفى وأنا عندي 17 سنه مسكتها أنا وأخويا بعده، وحبنا للمهنة هو اللي خلانا نستمر في ممارستها ولم نتخلى عنها حتى هذه اللحظة رغم قدم المكان».
أنواع مختلفة من المشروبات الساخنة يعدها الشاب الثلاثيني ويقدمها لزبائهم داخل شارع القرابية مشيرا إلى أن المنطقة لم تكن شعبية مثلما كانت في أيام زمان: «شارع القرابية كانت منطقة شعبية وكل ولكن حاليا المنطقة بقت فاضية مش زي زمان ومفيهاش روح».
ذكريات كثيرة عاشها ابن منطقة الدرب الأحمر في المنطقة، مؤكدا على أن العمل قديما كان أفضل من الآن:«أيام زمان كان في شغل في المنطقة وخاصة هنا في حارة القرابية عشان كان السوق هنا وبيصنعوا القرب بتاعه زمان اللي بيحطوا فيها المياه وقبل حلول شهر رمضان كان جدي بيوزع أنواع المشروبات على الأهالي كنوع من الفرحة، كان بيمشي بالصينينة، لكن حاليا مفيش الكلام ده».
رغم أن «فهد» يمتلك ورشة لصناعة الخيامية وزينة رمضان إلا أنه لم يتخلى عن مهنة التي ورثها أبا عن جد: «القهوة دي الأساس بتاعنا، اللي هو مهما كبرنا وطورنا من شغلنا لكن مش هنقدر نسيبها وده المكان اللي طلعنا منه» متمنيا أن يعود إلى الزمن الجميل.