حاول التعبير عن فرحته بفوز نادي الزمالك ببطولة الدوري للمرة الثانية على التوالي والـ14 في تاريخه، فلم يجد سوى توزيع تيشرتات تحمل اسم القلعة البيضاء، لعدد من طلاب الثانوية العامة، لإدخال السرور على قلوبهم، ومشاركتهم الفرحة.
عبد الحميد غازي، 32 عاماً، معلم أحياء وجيولوجيا، بمحافظة كفر الشيخ، قرر توزيع تيشرتات الزمالك على طلاب الثانوية العامة احتفالاً بفوز النادي ببطولة الدوري، ليعبر عن سعادته وحبه للقلعة البيضاء.
وزع تيشرتات الزمالك مجانا
«كنت واعد الطلاب من فترة لو الزمالك فاز بالدوري هوزع عليهم تيشرتات النادي مجاناً كنوع من أنواع التحفيز ووفيت بوعدي معاهم»، بهذه الكلمات بدأ «غازي» حديثه لـ«الوطن».
ويتابع «غازي»: «اشتريت مجموعة تيشرتات بالتعاون مع أحد الأصدقاء وهو صاحب محل ملابس رياضية، ووزعنا حوالي 12 تيشرت على الطلاب المتميزين، وفيه طلاب مستلمتش بس طلبت تتصور بالتيشرت عادي».
طلاب الثانوية العامة كانوا في حالة من السعادة والسرور بعد توزيع تيشرتات الزمالك عليهم، بحسب «غازي»: «معظم الطلاب كانت سعيدة جداً بفكرة توزيع التيشرتات، والحمد لله إننا قدرنا نحتفل بالدوري بطريقتنا».
ويضيف «غازي»: «أنا أُسرتي كلها زملكاوية ماعدا أخويا الكبير أهلاوي، وبنتعامل بروح رياضية عالية جداً، وأخويا كان فرحان جداً لفرحة الطلاب، وإحنا دايماً متعودين بنحتفل باستمرار بانتصارات نادي الزمالك المختلفة في كل المناسبات، ونشكر ربنا على تتويج نادي الزمالك ببطولة الدوري وهو فوز كان يستحقه كل مشجعي القلعة البيضاء».
أهديت الطلاب تيشرتات الأهلي من قبل
ليست هذه المرة الأولى التي يوزع فيها «غازي» تيشرتات رياضية على الطلاب حيث سبق وأن وزع عليهم تيشرتات النادي الأهلي: «دي مش أول مرة أوزع تيشرتات على الطلاب أنا سلمت قبل كده تيشرتات النادي الأهلي على طلاب الثانوية العامة، كنا بنعمل مسابقات عن المنهج زي دوري كده والطالب المميز في الآخر بياخد تيشرت لو أهلاوي بياخد تيشرت الأهلي ولو زملكاوي بياخد تيشرت الزمالك، وكنا بنعمل كده عشان نخرج برا توتر الدراسة مش أكتر، ومفيش تعصب لأن كلنا في الآخر واحد».
