10:29 م
الخميس 11 أبريل 2024
كتب- مروان الطيب:
لفت الفنان أحمد محارب الشهير بـ “دوجلاس”، الأنظار إليه بعد تقديمه لشخصية “رجب” التي جسدها ضمن أحداث مسلسل “أشغال شقة” الذي عرض بالنصف الأول لموسم دراما رمضان هذا العام.
وتحدث “محارب” في تصريحات خاصة لـ “مصراوي” عن تعاونه لأول مرة مع السيناريست والمخرج خالد دياب في أولى تجاربه الإخراجية، إلى جانب تعاونه للمرة الثالثة مع الفنان هشام ماجد، وعن كواليس تعاونه مع الفنانة مي كساب والفنانة أسماء جلال، إلى جانب ردود فعل الشارع على نجاح المسلسل.
وعن تجربته بمسلسل “أشغال شقة”، قال: “استمتعت بتجربة “أشغال شقة” جدًا حقيقي لأسباب كتير أولها التعاون مع الأستاذ المخرج خالد دياب وهي التجربة الإخراجية الأولى ليه لكن هو ليه تجارب كتير ناجحة جدًا واسم كبير في مجال التأليف واتشرفت جدًا بالتعاون معه كمخرج لأن مبدئيًا هو والأستاذة شيرين دياب هم اللي مألفين المسلسل وده كان مخليه شايف الرؤية كاملة وهو راجل لطيف جدًا في التعامل مع كل الناس ومركز طول الوقت في الشغل ودايمًا مقترحاته وتوجيهاته في المشاهد صحيحة 100%”.
كما تحدث عن تعاونه مع الفنان هشام ماجد: “هشام مش أول تعاون بيني وبينه انا اشتغلت معاه في فيلم قلب أمه واشتغلت معاه مسرحية على وضع الطيران وتم عرضها في موسم الرياض، ومن ساعة فيلم قلب أمه واحنا نعرف بعض كويس وانا بحب جدًا الشغل مع هشام وبحب الشغل مع شيكو كمان جدًا، وهشام من أكتر النجوم المتعاونة وحقيقي مبدع جدًا بيفكر لكل الموجودين في المشهد معاه وبيحاول يطلع المشاهد دايمًا في أحسن صورة سواء الموضوع عنده أو مش عنده سواء الضحك عنده أو عند غيره والمهم عنده أن المشهد يطلع مظبوط، وهادي وملتزم جدًا وتتعلم منه حاجات كتير وقلبه طيب وانا بحب التعامل مع هشام وشيكو جدًا.
وعن الفنانة أسماء جلال، أوضح: “دي أول مرة اتعامل معاها وانا بحبها كممثلة هي انسانة جميلة وكانت عاملة الدور بكل براعة وبخفة دم جميلة غير مبتذلة وده برضه يعود للمخرج لأنه كان موجهنا كلنا في منطقة أن الضحك يبقى طالع من الجد وهي من أكتر الشخصيات المتعاونة والشاطرة جدًا ودمها خفيف جدًا”.
أما عن تعاونه مع الفنانة مي كساب، أضاف: “أنا شغلي كله في أشغال شقة كان مع مي كساب، ودي أول مرة نشتغل مع بعض وكنا مفاجأة لبعض وطلعنا من التجربة دي أصدقاء جدًا وده بسبب طيبة قلبها الكبيرة وشطارتها وهي نجمة كبيرة طبعًا وهي اللي كانت بتقرب الأول وبتساعدني وده حببني فيها وهي شاطرة ومتمكنة كوميديانة كبيرة وممثلة قديرة بشكل عام ووجدنا سهولة في التعامل مع بعض وده خلق ما بينا كيميا سريعة في الشغل وده ظهر في اخر حلقتين في المسلسل وبالمناسبة بتبقى صعبة جدًا قفلة أي مسلسل خصوصًا لو مسلسل ناجح لأن الجمهور بيبقى مترقب جدًا النهاية والحمد لله ربنا وفقنا فيها وده كان بتعاون كل الأساتذة وهم أستاذ خالد دياب والأستاذ هشام ماجد وباقي فريق العمل”.
وعن ردود الفعل على المسلسل،اختتم حديثه: “بشكر ربنا على كل ردود الأفعال اللي جات لي، وكانت كبيرة جدًا سواء على السوشيال ميديا أو في الشارع والناس بتتأمل معايا بشخصيتي في المسلسل ويقولولي ليه اخدت الشقة من دكتور حمدي ده طول الوقت حتى الان الناس لما بتشوفني بتقولي حرام عليك انت ليه اخدت الشقة بتاعة دكتور حمدي والحمد لله ده تفاعل رهيب من الشارع مع المسلسل وأنا بعتبر أن ده هو النجاح الحقيقي”.
اقرأ أيضا:
“بإطلالة جريئة”.. هيفاء وهبي تخطف الأنظار في العيد
محمد سامي ينشر صورة مع والدته والجمهور يعلق: شبهك جدًا”