أمير رمسيس عن استقطاب نجوم أمريكيين لحضور “القاهرة السينمائي”: مش هندفع فلوس لنجم يجي يتصور ويمشي”

11:20 م


السبت 22 يوليه 2023

كتب- مروان الطيب:
حل المخرج ومدير مهرجان القاهرة السينمائي الدولي، أمير رمسيس، ضيفاً على برنامج “الستات” تقديم الإعلامية سهير جودة ويعرض على قناة “النهار”.

وتطرق “أمير” خلال الحوار للحديث عن تحديات الدورة الـ 45 والمقرر إقامتها في الفترة من 15 إلى 24 نوفمبر المقبل بدار الأوبرا المصرية، وعن برنامجه لدورة هذا العام وعن الضيوف المتوقع حضورهم الفعاليات، إلى جانب مشاريعه الإخراجية خلال الفترة المقبلة.

وعن دعوة عدد من النجوم الأمريكيين بدورة المهرجان المقبلة “عندنا محاولة لاستقطاب نجوم أمريكيين وفي دورة السنة اللي فاتت كنا بصدد تكريم فنان أمريكي كبير، وأبدى موافقته على الحضور وخلاص جهزنا تذاكر الطيران وللأسف اعتذر قبل بداية المهرجان بأسبوع، والسنة دي برضه فيه نجم مهم بس مش هنقدر نأكد أي حاجة لحد ما يتم التأكيد انه جاي بالفعل وساعتها هنعلن بشكل رسمي”.

واستكمل “احنا ماينفعش ندفع فلوس لنجم عشان هو نجم واحنا مهرجان لينا اسمنا ومتصنف من الفئة أ اللي عايز يجي عشان حاسس بأهمية المهرجان أهلاً وسهلاً بس أنا مش هروح أدفع 200 و300 ألف دولار في الظروف الاقتصادية اللي بتعاني منها البلد عشان أقوله تعالي أتصور على السجادة الحمراء”.

مضيفاً “مش عايزين نجوم يجوا عشان يتصوروا على السجادة الحمراء، اه يتلقى تكريم لكن كمان يعمل ماستر كلاس ونعرض أفلامه يبقى في احتكاك مع الجمهور وفكرة الظهور في مقابل مادي دي أستاذ حسين رافضها، وشايف إنها سياسة حكيمة جداً فيها تقدير لحجم المهرجان ومطالبة للفنانين أنهم يقدروا المهرجان”.