12:09 م
الثلاثاء 21 نوفمبر 2023
كتبت- بهيرة فودة:
قال مغني المهرجانات حسن شاكوش إنه ملتزم بحوالي 50 أسرة، وإذا توقف عن العمل هذه الأسر سوف تتأثر ماديا.
وقال “شاكوش” خلال بث مباشر عبر حسابه الرسمي بموقع”إنستجرام”: “ورايا التزامات، ومعايا أخواتي وأهلي حوالي 5 أو 6 بيوت وفرقتي حوالي 40 فرد واللي شغالين معايا حوالي 7 أشخاص، ولو أنا قعدت في البيت الـ 50 أو 60 بيت دول مش هيلاقوا يأكلوا ومتعلقين بعد ربنا بيا أنا”.
وعن غنائه للمهرجانات، قال: “أنا مميز في الحتة دي وأنا لما بغني بحب أني أكون متفاعل مع الجمهور بتاعي وفيه ناس من الجمهور بيحبوا رقصي، والواحد مش بيلبس بدلة رقص ويطلع يغني وربنا يخليلنا الناس اللي في ضهرنا ويحبونا واللي بيكرهنا يقولنا ربنا يهديكم ويصلح حالكم لأننا وصلنا لمرحلة إن 95% مننا أننا بنكره الخير لأي حد ناجح حتى لو راجل بتاع ورنيش هنلاقي ليه أعداء”.
وأضاف عن أحداث فلسطين: “أنا كنت موقف شغلي شهرين أو تلات شهور عشان أخواتنا في فلسطين والواحد لو في أيده كان يعمل أي حاجة كنا هنعمل مش هنتأخر ووقفنا شغلنا شوية بس الشغلانة بتاعتنا ديه اللي ينام فيها شهر وميبقاش موجود الموضوع بيبقى صعب، والشغلانة دي مش عايزة النوم عايزة 24 ساعة تفكر وتعمل”.
وتابع: “لو قعدت في البيت مش هلاقي أكل وأنتوا عارفين الدنيا عاملة إزاي والغلا والله يكون في عون ناس كتير يعني.. محدش قالي أوقف شغل، لكن ذوقيا مني مينفعش أشوف اخواتي بيموتوا في فلسطين وبقالي 3 شهور مشتغلش بسبب أخواتنا في فلسطين، ولو هتلاحظوا المواعيد اللي كنت ملتزم بيها والحفلات ومنزلتش منهم ستوري من حفلة على إنستجرام ومبنزلش حتى الدعاية بتاعة الأماكن”.