12:39 م
الإثنين 28 أغسطس 2023
كتبت- منال الجيوشي
كشف الفنان حسن فؤاد عن سبب اختفاء مطربي التسعينات قائلا: “اختفائهم كان لأن حاجات كتير أوي اختلفت يعني مقدرش أقول إن اللي بيتقدم ده فن شعبي، دايما بقول محدش ضيع المزيكا في مصر غير الفن الشعبي لأنهم فاهمينه غلط، الأطلال دي غنوة شعبية حد يصدق ؟ آه شعبية لأن بيسمعها المكوجي، بيسمعها النجار بيسمعها الظابط بيسمعها الوزير لكن الذوق اتغير لأنهم فهموا المسألة غلط.
وأضاف فؤاد خلال تصريحاته مع الإعلامية إنجي هشام في برنامج المنسي عبر قناة هي: “محمد رشدي هيفضل رقم ١ في الغنوة الشعبية هيفضل محمد العزبي رقم ١ هما دول الغنا الشعبي، حد يقول الغنا الشعبي يبقى محمد رشدي، محمد رشدي هز عرش عبدالحليم حافظ، لكن دلوقتي اللي بيتقدم مش غنا شعبي لا شكلا ولا موضوعا مع احترامي لكل اللي بيغنوا شعبي”.
وتابع: “مش بسمع مهرجانات غير في الشارع مقدرش أسمعها، لا ذوقي ولا شكلي ولا تربيتي”.
واختتم حسن فؤاد حديثه قائلا: “أنا ضد أنه يتقال أن الجمهور عاوز كده وأكبر دليل إن فترة مسلسل “أرابيسك” شعبان عبدالرحيم كان طالع لكن غنوة تطلع وتكسر الدنيا يبقى الجمهور مش عاوز كده الجمهور عاوز شغل مخدوم كلاما ولحنا وأداء وبقى في حاجات بتتفرض عليه، أنا من فترة في فرح مكنتش مصدق اللي أنا سامعه”.