فيدرا تدعو للمقاطعة: قاطعوا واتبرعوا واتكلموا

10:14 م


الأحد 19 نوفمبر 2023

دعت الفنانة فيدرا الجمهور العربي لمقاطعة المنتجات الأجنبية التي تدعم إسرائيل، وذلك عبر فيديو نشرته على صفحتها الرسمية على موقع التواصل الإجتماعي “انستجرام”.

وقالت فيدرا خلال الفيديو: “أنا مقدرش أحس إني بساهم ولو بجنيه لشركة صهيونية، أو شركة تدعم الصهيونية، الحقيقة ان في ناس بتقولي طب أخبار الفيسبوك والانستجرام وأبل والحاجات ال it والتكنولوجي هتعملي فيهم إيه، هقولهم إني هستخدم كل الحاجات دي لأني مش لاقيالها بديل عربي أو مصري، وفي فرق كبير بين إني أقاطع أكل وشرب بملى بيه بطني وإن أنا أقاطع تكنولوجي ممكن أستخدمها سلاح ضدهم لأني معنديش سلاح بديل”

وتابعت: “أنا دلوقتي عندي platforms على السوشيال ميديا، وعندي موبايلي واللاب توب الحاجات دي مالهاش بديل، وف نفس الوقت مش بستخدمها عشان أتسلى، الحاجات دي بستخدمها عشان أنشر بيها القضية الفلسطينية، وهستخدمها سلاح في إيدي، هما ادوني سلاح ف إيدي ضدهم، دي مش أكل وشرب وشيكولاتة وقهوة دي حاجات مهم نستخدمها ونعلي صوتنا من خلالها هما ادونا حاجة هنستخدمها ضدهم.”

واختتمت فيدرا حديثها بدعوة جمهورها للمقاطعة حيث قالت: “متستهونوش يا جماعة بالمقاطعة، المقاطعة مهمة جدا، عشان كل واحد من موقعه يعمل اللي يقدر عليه، قاطعوا واتبرعوا واتكلموا، ولو حد قال هي جت عليا آه جت على كل إنسان فينا، كل واحد فينا صوته بيفرق، عمله بيفرق، متستهونش بنفسك انت مهم.”