07:07 م
الأحد 27 أغسطس 2023
كتب- مروان الطيب:
دعم عدد كبير من نجوم الفن، الفنان شريف منير وابنته أسما بعد فيديو نشره على حسابه الرسمي بموقع “انستجرام” والذي دافع خلاله عن قرار ابنته بقص شعرها قائلًا: “هي حرة تعمل اللي عايزاه طالما مابتأذيش حد”.
وحرص نجوم الفن على التعليق على فيديو شريف منير منهم الفنانة ياسمين عبدالعزيز التي اكتفت بتعليق قلوب، والفنانة مايان السيد التي قالت: “على الأباء الأخذ بالنصيحة”، كما علقت الفنانة حلا شيحة قائلة: “أسما دي قمر”، والفنانة سلمى أبو ضيف التي كتبت: “أسما من أكتر الشخصيات الجميلة اللي عرفتها بالداخل ومن الخارج”.
وعلقت الفنانة نسرين طافش بـ إيموجي “قلب” ويد تصفق، كما علق الفنان أحمد زاهر: “الله عليك يا أستاذ”، وعلق الفنان عمرو عبد العزيز: “كبر دماغك الناس بتتكلم على أي حاجة وكل حاجة”
وتضمن الفيديو الذي نشره شريف منير دفاعًا عن ابنته “أسما” الآتي: “مساء الخير، باكل سمك مشوي ورز أبيض، إيه الدوشة اللي إنتو عاملينها دي وإيه الضجة اللي إنتو عاملينها دي، كل ده عشان بنتي قصت شعرها قدام الكاميرا إيه الغلط اللي هي عملته”.
واستكمل: “تصرف عادي جدًا مفيهوش أي حاجة، أوعوا تفتكروا إني هاجي على بنتي عشان خاطر أكسب رضاكم.. دي بنتي اللي ماليش غيرها وبحبها”.
وأوضح منير: بالمناسبة اللوك اللي عملته عاجبني وأنا مبسوط منها أوي، بس قبل ما الإخوة السادة الملايكة الصالحين اللي عمالين يقلوا أدبهم ويشتموا، وبيقولوا تاخد التريند وجاتها البلاء في شكلها وبيقولوا أبوها معرفش يربيها، لا أنا بنتي متربية كويس جدًا بس هي بتتصرف باللي هي حاسة بيه، المهم إنها متكونش بتأذي حد”.
واستكمل: “قبل ما تتكلموا بصوا على نفسكو واتفرجوا على عيلتكو وعلى إخواتكو وعلى الناس اللي حواليكو قبل ما تنتقدوا وتغلطوا وتقولوا متربتش بـ 3 تعريفة أو بربع جنيه تربية، لا أنا بنتي متربية كويس جدًا”.
واختتم: “أسما أنتي شكلك زي القمر وشكلك حلو جدًا وخدتي التريند برافو عليكي، متسمعيش كلام حد ومتهتميش بكلام حد وأنا مش مهتم بالكلام اللي بيتقال عليا ولا عليها،المهم إننا مش بنضر حد، سلام عليكم”.
وحرصت أسما شريف منير على حضور فعاليات حفل توزيع جوائز مهرجان القاهرة للدراما والذي أقيم مساء الخميس الماضي بمدينة العلمين الجديدة، ويعد ظهورها هو الأول منذ كشفها عن حلاقة شعرها بالكامل بفيديو نشرته عبر حسابها الرسمي على “انستجرام”.
وعلقت “أسما” عن حلاقة شعرها قائلة: “شعرى بقاله فترة بيقع جامد، ده غير إن من كتر العمايل اتحرق، وبقي مش صحي خالص، وقررت أنفذ قرار كان بقالي كتير أوي نفسي أخده.. أبدأ من جديد، وأحرر نفسي، وأفتح صفحة جديدة، حقيقي هو قرار صعب جدا بس حسسني بقوة وتفاؤل”.
وتابعت: “رميت ورايا حاجات كتيرة أوي بمجرد إني شلت شعري، قلبي كان بيدق جدا وبعديها حسيت إني مليانا أدرينالين.. خطوة جريئة ومرعبة بس حاسة إني طالعة منها بدرس”.
وأضافت: “عارفة إن فيه ناس كتير هتهاجمني بس أنا فارق معايا احساسي بالراحة اللي أنا حساها دلوقتي.. عادي هيطول تاني بس الإحساس ده مش هحسه غير مرة.. بكره هتشوفوا النتيجة الأخيرة”.