12:38 م
الجمعة 28 يوليو 2023
تحدث الفنان بيومي فؤاد، عن أمور عديدة في حياته الشخصية وشائعة بتر قدمه، وأمنيته العمل مع الفنان يحيي الفخراني، والدور الذي يتمنى تقديمه بالسينما، وسبب نجاح مسلسلات جعفر العمدة والهرشة السابعة وتحت الوصاية في رمضان الماضي 2023، والأعمال التي يعتز بها في حياته، وغيرها من الأمور.
ونستعرض لكم أبرز تصريحات بيومي فؤاد على إذاعة “نجوم إف إم” في السطور التالية:
– أنا خجول جدا وصريح وده بيزعل الناس، مبعرفش أمسك العصاية من النص ومبعرفش أقول أنا مالي لأنها كلمة سلبية لذلك أفضل عدم الظهور إعلاميا.
– طول ما أنا عارف إجابة السؤال مش بعرف أجمل كلامي فأنا صريح واللي في قلبي بقوله على طول وده ساعات بيزعل .
– أنا شخص كاره للنكد والزعل وأعرف أبسط نفسي بأقل الإمكانيات.
– ورثت من والدي الصبر وعندي أمل دايما في بكره وهذا ما أقوم بتربية أولادي عليه .
– كنت أقدم مسرحيات الهواة زمان من غير أجر ومن هنا عرفني مخرجين كبار زي محمد ياسين.
– نفسي أعمل في السينما دور جد من أوله لأن الناس بتقولي أنت بتتكلم جد ولا بتهزر لأن الكوميديا اللي بقدمها الناس بتقول أنها مختلفة فعايز أقدم حاجة تراجيدي من الألف للياء.
– فيه مشهد جد قدمته لا أنساه في فيلم اسمه “بني آدم” ليوسف الشريف ودينا الشربيني وعملت مشاهدي كلها في يوم واحد ودوري كان مليئ بالمفاجآت.
– الأعمال اللي أعتز بيها الكبير أوي وموجة حارة ودول الناس في مصر عرفوني بيهم (الدكتور ربيع وشخصية موجة حارة المعقدة في الأداء)، وأيضا اسم مؤقت، حملة فريزر، وقفة رجالة، ماما حامل.
– أنا بعتذر في السنة 3 أضعاف الأعمال اللي بقدمها وساعات المنتج أو المؤلف يقولي لو مش هتعمل الفيلم مش هيتعمل، فحب الناس ليا نعمة ومبقدرش أقول لأ.
– أتمنى أشتغل مع الدكتور يحيي الفخراني من رائحة الزمن الجميل ومقدمش عمل سيئ طوال تاريخه.
– جت فترة تعبت فيها بسبب ضهري وقدمي، فطلعت شائعة أنه تم بتر قدمي فلقيت وفد كبير من أكبر النجوم في الكويت يقولولي حجزنا الطيارة وجاينلك وإسعاد يونس يوميا بتطمن عليا.
– “جعفر العمدة” نجح لأنه اتكلم عن الحارة المصرية وأي عمل عن الحارة المصرية والشارع دايما بينجح.
– مسلسلي “تحت الوصاية” و”الهرشة السابعة” نجحوا لأنهم بيقدموا أعمال محلية.
– أهتم بالعمل الناجح حتى لو مشاهد ضيف شرف فمهم جدا الكيف وليس الكم.